ICTA නව සභාපති මහාචාර්ය ලලිත් ගමගේ

0
41
Author(s): 
මහින්ද අලුත්ගෙදර

ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනයේ නව සභාපතිවරයා වශයෙන් මහාචාර්ය ලලිත් ගමගේ මහතා පත්කර තිබේ.

මෙම ආයතනයේ හිටපු සභාපති ජයන්ත ද සිල්වා මහතා තාක්ෂණ අමාත්‍යාංශයේ ලේකම්වරයා ලෙස පත්කිරීමත් සමඟ පුරප්පාඩු වූ මෙම ධූරය සඳහා ලලිත් ගමගේ මහතා පත්කර තිබෙන බව ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය පවසයි.

ඒ අනුව මහාචාර්ය ගමගේ මහතා හෙට (01) සිට නව ධූරයේ රාජකාරි කටයුතු ආරම්භ කිරීමට නියමිතව තිබේ.

මහාචාර්ය ලලිත් ගමගේ මහතා 1999 දී ශ්‍රී ලංකා තොරතුරු තාක්ෂණ ආයතනය (SLIIT) පිහිටුවීමේ දී මූලික වූ පුද්ගලයෙකු වන අතර මේ වනවිට එහි උපකුලපති සහ ප්‍රධාන විධායක තනතුර හොබවයි. දීර්ඝ කාලයක් පුරා තොරතුරු තාක්ෂණ කර්මාන්තය ප්‍රවර්ධනය කිරීමට දායක වී ඇති අතර ලංකා මෘදුකාංග පදනමේ (LSF) සභාපති, ආතර් සී. ක්ලාක් නවීන තාක්ෂණ ආයතනයේ (ACCIMT) සභාපති, ශ්‍රී ලංකා අපනයන සංවර්ධන මණ්ඩලයේ වෙළඳ තොරතුරු ජාලයේ තොරතුරු සන්නිවේදන තාක්ෂණ පොකුරු සභාපති සහ විධායක අධ්‍යක්ෂ ලෙස ද කටයුතු කර ඇත.

තාක්ෂණ සමාගම් විශාල සංඛ්‍යාවක් බිහිකළ ශ්‍රී ලංකාවේ පළමු තාක්ෂණ ඉන්කියුබේටර් කන්සෙප්ට් නර්සරි සංකල්පය පිහිටුවීමට ද මහාචාර්ය ගමගේ මහතා පෙරමුණ ගත්තේය. ඔහු පත්කරන අවස්ථාවේ දී ශ්‍රී ලංකාවේ තොරතුරු හා සන්නිවේදන තාක්ෂණ නියෝජිතායතනයේ (ICTA) අධ්‍යක්ෂ මණ්ඩල සාමාජිකයෙකු ලෙස සේවය කරමින් සිටි අතර ශ්‍රී ලංකාවේ අනන්‍ය ඩිජිටල් හැඳුනුම්පත් ව්‍යාපෘතියේ තාක්ෂණික කමිටුවේ සභාපතිවරයා ද විය.

මහාචාර්ය ගමගේ මහතා ශ්‍රී ලංකා මෘදුකාංග හා සේවා සමාගම් සංගමයේ (SLASSCOM) උපදේශක මණ්ඩල සාමාජිකයෙකු වන අතර ශ්‍රී ලංකා රාජ්‍ය නොවන උසස් අධ්‍යාපන ආයතන සංගමයේ (SLANSHEI) ආරම්භක සභාපතිවරයා ද වේ.

මහාචාර්ය ගමගේ මහතා මොරටුව විශ්ව විද්‍යාලයේ විද්‍යුත් හා විදුලි සංදේශ ඉංජිනේරු උපාධිධාරියෙකු වන අතර කැනඩාවේ බ්‍රිතාන්‍ය කොලොම්බියා විශ්ව විද්‍යාලයෙන් ආචාර්ය උපාධියක් ලබාගෙන එහි අනුබද්ධ මහාචාර්යවරයකු ලෙස ද සේවය කරයි. වසර 2000 දී ඔහු අධ්‍යයන නායකත්වය සඳහා වසරේ විශිෂ්ටතම තරුණ පුද්ගලයා (TOYP) සම්මානය දිනා ගත්තේය.

LEAVE A REPLY

Please enter your comment!
Please enter your name here