ඇතැම් කෝටිපති ලොතරැයි ජයග්‍රාහකයන්ගේ දුර්වල මුදල් පරිහරණයෙන් හිටපු තැනටත් වඩා පහළට වැටෙනවා කප්රැක හා ජයෝදා සුපිරි ජය ලැබූවන්ට චෙක් පත් පිරිනමමින් අගමැති කියයි

0
32

ඇතැම් කෝටිපති ලොතරැයි ජයග්‍රාහකයන්ගේ දුර්වල මුදල් පරිහරණය හේතුවෙන් ඔවුන් හිටපු තත්ත්වයටත් වඩා පහළ මට්ටමට වැටී ඇති නිසා ජයග්‍රාහී මුදල් දූ දරුවන්ගේ පවුලේ හා අවසානයේ රටේ යහපත වෙනුවෙන් යොදවන්නැයි අගමැති මහින්ද රාජපක්ෂ මහතා පැවැසීය.

සංවර්ධන ලොතරැයි මණ්ඩලයේ කෝටිපති කප්රුක හා ජයෝදා ලොතරැයිපත්වලින් බිහිවූ සුපිරි කෝටිපති ජයග්‍රාහකයන් දෙදෙනාට පෙරේදා (07) අරලියගහ මන්දිරයේදී ඊට අදාළ චෙක්පත් ප්‍රදානයට එක්වෙමින් අගමැති මහින්ද රාජපක්ෂ මහතා මේ බව අවධාරණය කළේය.

කෝටිපති කප්රුක 652 වන වාරයේ සුපිරි ජයමල්ල රු. 87,991,625/- ක මුදල දිනාගත් අඹන්පොල කුමාර පතිරන්නැහැලාගේ සුනිල් මහතාට හා ජයෝදා 1717 වන වාරයේ සුපිරි ජයමල්ල රු. 57,138,276/- ක මුදල දිනාගත් ගල්ගමුව ඒ.ජී.බී.ජී.කොඩිතුවක්කු මහත්වරුන්ට අදාළ චෙක්පත් මෙසේ අගමැතිවරයා අතින් ලබා දුන්නේය.

මේ ලොතරැයිපත් අලෙවි කරනු ලැබුවේ අඹන්පොල අලෙවි නියෝජිත යූ.ඩී.එල්.දිනේෂ් කුමාර මහතා හා ගල්ගමුව අලෙවි නියෝජිත ටී.එම්.එස්.බී. මැණිකේ මහත්මිය විසිනි.

ලොතරැයි ජයග්‍රාහකයන් විසින් දිනා ගන්නා මුදල් සිය පවුලේ හා දරුවන්ගේ අනාගත අභිවෘද්ධිය වෙනුවෙන් පමණක් යෙදවීමට කටයුතු කරන්නැයි ද රාජපක්ෂ මහතා උපදෙස් දුන්නේය.

ජයග්‍රහණය කළ මුදල් පෞද්ගලිකව දිනාගත්තද මේ මුදල් නිසි පරිදි තමන්ගේ දියුණුව වෙනුවෙන් යෙදවීමට කටයුතු කරන්න. දූ දරුවන් මෙන්ම පවුලේ අනාගතය වෙනුවෙන් මේ මුදල් කදිම ආයෝජනයක් ලෙස යෙදා ගත හැකියි. විශාල මුදල් ප්‍රමාණයක් ලැබූ පමණින් එම මුදල් අනවශ්‍ය දෑ සඳහා වැය කිරීමෙන් අවසානයේ කිසිවක් නැති තත්ත්වයට නැවත පත්වන්න පුළුවන්. ඇතැම් කෝටිපති ලොතරැයි ජයග්‍රාහකයන් මෙවැනි ජයග්‍රහණවලින් පසුව දුර්වල මුදල් පරිහරණය නිසා හිටපු තත්ත්වයටත් වැඩිය පහළ මට්ටටමට වැටිලා තියෙනවා. එවැනි උදාහරණ ඕනෑ තරම් අපට දැනගන්න ලැබී තියෙනවා. ඒ නිසා මේ මුදල් දූ දරුවන්ගේත් පවුලේත් අවසානයේ රටේ යහපත වෙනුවෙන් යොදවන්නයැයි අගමැතිවරයා මෙහිදී සිහිපත් කළේය. සංවර්ධන ලොතරැයි මණ්ඩලයේ සභාපති අමිත ගමගේ මහතා ඇතුළු පිරිසක් මේ අවස්ථාවට එක්ව සිටියහ.

 

LEAVE A REPLY

Please enter your comment!
Please enter your name here