බංග්ලාදේශ මහජන සමූහාණ්ඩුවේ ශ්‍රී ලංකා නව මහ කොමසාරිස් ජනපතිට අක්ත පත්‍රය පිළිගන්වයි

0
46

බංග්ලාදේශ මහජන සමූහාණ්ඩුව වෙනුවෙන් ශ්‍රී ලංකාවට අලුතින් පත්ව සිටින නව මහ කොමසාරිස් තාරික් මොහොමඩ් අරිෆුල් ඉස්ලම් මහතා ඊයේ (11) පෙරවරුවේ ජනාධිපති මන්දිරයේ දී ජනාධිපති ගෝඨාභය රාජපක්ෂ මහතා වෙත සිය අක්ත පත්‍රය පිළිගැන්වීය.

ශ්‍රී ලංකාවේ වත්මන් ආර්ථික වාතාවරණය සහ කොවිඩ් 19 පාලනයට රජය ගෙන ඇති පියවර පැහැදිලි කළ ජනාධිපතිවරයා බංග්ලාදේශය ඇතුළු කලාපීය රාජ්‍යයන් සමඟ හඳුනාගත් කේෂ්ත්‍රවල ද්විපාර්ශ්වික සබඳතාව හැකි උපරිමයෙන් වර්ධනය කර ගැනීම සිය අභිලාෂය බව අක්ත පත්‍ර බාරගැනීමෙන් අනතුරුව පැවැති සාකච්ඡාවේදී පැවසීය.

ඉන්දීය සාගරයේ පිහිටි රාජ්‍යයන් ලෙස සාමුද්‍රීය සහයෝගීතා වර්ධනයට විශාල ඉඩ කඩක් ඇති බව ජනාධිපතිවරයා පෙන්වා දුන් අතර තම රට ඊට ඉහළ ප්‍රමුඛත්වයක් දී ඇතැයි නව මහ කොමසාරිස්වරයා කීය.

කෘෂිකර්මය සහ අපනයන බෝග ප්‍රවර්ධනය, සංචාරක ව්‍යාපාරය, අධ්‍යාපනය සහ වෙළෙඳාම සබඳතා ප්‍රසාරණය කළ හැකි සෙසු ක්ෂේත්‍ර ලෙස ජනාධිපතිවරයා විසින් නම් කරනු ලැබීය. විශ්වවිද්‍යාල මට්ටමේ අධ්‍යාපන සහයෝගීතාව ප්‍රමුඛ අවශ්‍යතාවක් යැයි හෙතෙම සඳහන් කළේය.

ශ්‍රී ලාංකික ශිෂ්‍ය ශිෂ්‍යාවන් විශාල පිරිසක් දැනටමත් බංග්ලාදේශයේ උසස් අධ්‍යාපනයේ නිරතව සිටින බව සඳහන් කළ නව මහ කොමසාරිස්වරයා අන්‍යොන්‍ය ප්‍රතිලාභ ලැබෙන අයුරින් සිය රටේ අධ්‍යාපන අවස්ථා ශ්‍රී ලංකාව වෙනුවෙන් පුළුල් කිරීමට සූදානම් බව පැවසීය.

2018න් පසු ශ්‍රී ලංකාවේ රාජ්‍ය නායකයකු බංග්ලාදේශයේ චාරිකා කර නැතැයි සඳහන් කළ අරිෆුල් ඉස්ලම් මහතා නිල චාරිකාවක් සඳහා සිය රටට එන්නැයි ජනාධිපති රාජපක්ෂ මහතාට කළින් කර තිබූ ආරාධනය යළි සිහිපත් කළේය.

රාජ්‍ය නායක මට්ටමේ සබඳතාවන්හි අවශ්‍යතාවන් අවධාරණය කළ ජනාධිපතිවරයා වත්මන් දුෂ්කර සමය අවසන් වීමෙන් පසු ඒ පිළිබඳව අවධානය යොමු කරන බව කීය.

විදේශ ඇමති දිනේෂ් ගුණවර්ධන, විදේශ ලේකම් අද්මිරාල් ජයනාත් කොළඹගේ යන මහත්වරු ද මේ අවස්ථාවට එක්ව සිටියහ.

 

නුවන් කොඩිකාර

LEAVE A REPLY

Please enter your comment!
Please enter your name here