24 C
Colombo
Sunday, June 20, 2021
More

    Latest Posts

    ඇත්තෙන් පෙරළි කළ එච්. ජී. එස්.

    - Advertisement -

    ඒ 1965 – 70 අගමැති ඩඩ්ලි සේනානායක මහතාගේ පාලන අවධියයි. කීර්තිමත් ‘ඇත්ත’ පුවත්පතේ ආරම්භක යුගයයි. අභියෝග රාශියක් මධ්‍යයේ ප්‍රවීණ චිරප්‍රසිද්ධ ජනකාන්ත පුවත්පත් කලාවේදී එච්. ජී. එස්. රත්නවීරයන්ගේ මූලිකත්වයෙන් බී. ඒ. සිරිවර්ධන, සිරිලාල් කොඩිකාර, නිව්ටන් සෙනෙවිරත්න, හෙන්රි පමුණුව යන අදීන පත්තර කලාවේදීන්ගේ සහභාගිත්වයෙන් ‘ඇත්ත’ රටේ වමේ පොදු ජනතාව සිප වැලඳගන්නා කාලයයි. 1964 දෙසැම්බර් 14 වනදා එළිදුටු ඇත්ත පත්තරයට එරෙහිව එජාප පාලනාධිකාරිය විසින් හේතු ඇතුව ද නැතුව ද තර්ජනාත්මකව ක්‍රියාකාරී වූ යුගයයි.

    ඇත්ත, ජනදින, ජනසතිය වමේ පත්තරවලට පමණක් නොව ලංකාදීප, දිනමිණ, දවස පුවත්පත්වලට ද බලපාන ආකාරයෙන් ප්‍රවෘත්ති බලධරයකු විසින් පුවත්පත් කලාවේ ආචාර ධර්මවලට ද පටහැනිව පාලනය කරන යුගයයි.

    - Advertisement -

    ‘ඇත්ත’ ඇත්ත වශයෙන්ම පෙරළිකාර පුවත්පතක් විය. ‘ඇත්ත’ පත්තරයක් මිලට ගැනීමට හැටේ දශකයේ (1964 – 1970) ඇතැම් දිනවල කෝට්ටේ පාරේ මහා පෝලිමක් විය. අනෙක් පත්තර, පත්තර තට්ටුවල වේළි වේළී තිබුණි. ඇත්ත නැත. එදා සති දෙක තුනක් පැරණි ඇත්ත පත්තරයක් බෝතල් පත්තර කඩයකින් සොයා ගැනීම ද ඉතා අපහසු විය.

    යූ. ඇන්. පී. ආණ්ඩුවත්, ඩඩ්ලි හාමුත් පක්ෂයේ ඉහළ පහළ නායකයෝත් ‘ඇත්ත’ තමන්ට එල්ලවූ මාරකයක් ලෙස සැලකූහ. බාධා පමණක් නොව තර්ජන ද එල්ල විය. කිසිවකින් ප්‍රතිඵලයක් නොලද විට බොරු චෝදනා නගා ඇත්ත කාර්යාලයම වසා දැමූහ. මාස කිහිපයක් වසා තහනම ඉවත් කිරීමෙන් පසු ‘ඇත්ත’ කලින් තිබුණටත් වඩා ජනප්‍රිය විය.

    රටේ සාමකාමී තත්ත්වයක් ඇති කර ගැනීම සඳහා යැයි කියමින් රට පුරා හදිසි නීතිය පනවා ප්‍රවෘත්ති පාලනයක් ද ඇති කළේය. ඇත්තට පමණක් නොව සියලු පුවත්පත්වලට වාරණයක් බව ප්‍රදර්ශනය කෙරිණි. හැම පත්තරයකම වාගේ ප්‍රවෘත්ති බලධාරියා විසින් කපා හරින ලදී යන පාඨයක් ප්‍රදර්ශනය විය.

    - Advertisement -

    එක්තරා දිනක් ඇත්ත පත්තරයේ පිටපතක් ප්‍රවෘත්ති බලධරයාගේ අනුමැතිය සඳහා ඉදිරිපත් කෙරිණි. ඩඩ්ලි රජයේ දූෂණ අල්ලස් අක්‍රමිකතා සම්බන්ධ තොරතුරු රාශියක් එහි පළකර තිබුණි. ඇතැම් ඇමැතිවරුන්ගේ රහස් ලිපිවල ඡායා පිටපත් සමඟ තොරතුරු කියවූ බලධරයා අතිශයින්ම කලබලයට පත් විය. පත්‍රය පසෙකින් තබා අවශ්‍ය උපදෙස් ගන්නට රජයට ඉතා පක්ෂපාත නීතිඥයකු පසුපස ප්‍රවෘත්ති බලධාරියා දුරකතනයෙන් එළවාගෙන ගියේය.

    ඇත්ත පිටපත රැගෙන ගිය උපකතුවරයා සමඟ ඉදිරියට කැඳවූ ප්‍රවෘත්ති බලධාරියා තර්ජනාත්මකව කතා කළේය.

    “මේ ලිපිය මං සම්පූර්ණයෙන් කපනවා. මේකට ඉඩ දෙන්න බැහැ.”

    - Advertisement -

    “එහෙනම් සර් අපේ ප්‍රධාන කර්තෘතුමාට කතා කරල කියන්න.” ඒ උප කර්තෘවරයාය. බලධරයා එච්. ජී. එස්ට කතා කරයි.

    “මිස්ටර් රත්නවීර, මා එක්ක තරහ වෙන්න එපා. මට මේ ලිපිය සම්පූර්ණයෙන්ම කපා හරින්න සිද්ධ වෙනවා.”

    මම මේ ආණ්ඩුවේ ගැත්තෙක් නොවෙයි. මම මගේ රාජකාරිය කරන්න ඕන… මං දන්නවා. ආරක්ෂක නීතිවලට මුවාවෙලා ක්‍රියා නොකළොත් මට වෙනත් ආණ්ඩුවකින් දඬුවම් විඳින්න වෙනවා.”

    “බලධාරියා නැවත පත්‍ර පිටපත දිගහරියි. ඔහු නොපමාව අදාළ ලිපිය හරහා තහනම් නියෝගය දැක්වෙන මුද්‍රාව ද තැබුවේය.

    එච්. ජී. එස්. සැන්දෑවේ ඇත්ත කාර්යාලයට පැමිණෙන විට පත්‍රය මුද්‍රණය සඳහා යැවීමට සූදානම් කර තිබිණි. බලධරයා විසින් කපා හැර දමා තිබුණු ලිපිය හරහා “ප්‍රවෘත්ති බලධරයා විසින් කපා දමන ලදී” යනුවෙන් අකුරු අමුණා තිබේ.

    එච්. ජී. එස්. මුද්‍රණාලයට යැවීමට සූදානම් කර තිබුණු පිටුව දෙස මොහොතක් බලා සිටියේය.

    ඔහු සිරා (බී.ඒ. සිරිවර්ධන) දෙසට හැරුණි. ඔහු අ‍සුනෙහි නැත. ඒ ළඟම ලාල් සිටිනු පෙනේ.

    ලාල්, (සිරිලාල් කොඩිකාර) බලධරයා විසින් කපා හරින ලදි. කොටස අහක් කරල දමනවා. එතෙන්ට ලොකු අකුරෙන් “බල්ලො කෑවා” කියල දමනවා. එච්. ජී. එස්. ගේ හඬ රළුය, ඝනකමය. වේගවත්ය. එච්. ජී. එස්. කාර්යාලයෙන් පිටතට ගියේය. ඒ අතර පැමිණි සිරාට සියල්ල ඉතා කෙටියෙන් පැවසීය.

    සිරා විවෘත සිනහවෙන් උපදේශක කර්තෘගේ අදහස අනුමත කළේය.

    සිරා පත්‍ර කාර්යාලය ඇතුළට එනවිට ලාල් මුවහත් සිහින් තුඩක් සහිත පොරොවෙන් අවශ්‍ය තැන් සොය සොයා කපා දමයි. ‘බල්ලො කෑවා’ ‘බල්ලො කෑවා’ යනුවෙන් සඳහන් කරයි.

    සිරා කැපෙන කොටන තැන් නිරීක්ෂණය කරයි. තදියම්ම තැන්වලට අත් පොරොවෙන් යළිත් කොටයි.” එක්කො ඉන්නවා, නැත්තම් යන්නම යවනවා.

    පසු දින පත්‍රය කියවූ – නැරඹූ බලධාරියා මහත් සේ කලබලයෙන් කෝපයට පත් විය. තමන්ට පෞද්ගලිකව කරන ලද අපහාසයක් යැයි ද ඔහුට සිතුණි. ඔහු නොපමාවම නීති දෙපාර්තමේන්තුවට පැමිණිලි කළේය. ‘බල්ලා’ යන්නෙන් ‘බලධරයා’ හෝ ‘බලධාරියා’ යන තේරුමත් දිය හැකි දැයි සිංහල, ඉංග්‍රීසි, සංස්කෘත භාෂා දිගේ ඉහළට ගිය පඬිවරුන්ගෙන් විමසුවේය. ‘බල්ලා’ ‘බල්ලන්ගෙන්’ වශයෙන් වර නැඟුවේය.

    එහෙත් බල්ලා කෑවා යන යෙදුම පිළිනොගෙන සිටීමට තරම් තර්ක බුද්ධියක් බලධරයාට නැත. ‘ඇත්ත’ පත්‍රය කියවූ ඇතැම් ඇමැතිවරු අගමැති හමුවී ඇත්ත තහනම් කිරීමට යෝජනා කළහ. “ඒක මගේ වගකීමක් නොවෙයි” ඇමැතිතුමා. ගරු ඇමැතිතුමාගේ වැඩක්.

    ඉන්පසු නිකුත් වූ සෑම ඇත්ත පත්‍රයකම බලධරයා කොටස් කැපීම වෙනුවට බල්ලො කෑවා කොටස් යන්න නිතර නිතර යෙදීම නිසා ඉතා ඉක්මනින් ඉතා වැඩි කලක් ගතවන්නට පෙර ආණ්ඩුව පුවත්පත් තහනම ඉවත් කිරීමට තීරණය කළාය.

    “බලනවා මගෙ බල්ලො කෑවා යෙදුම” නිසා වෙනස් කර ගන්න ශක්තියක් නැති ආණ්ඩුවට පුවත්පත් තහනම ඉල්ලා අස්කර ගන්න සිද්ධ වුණා.

    එස්. ජී. එස්. මුහුණ පුරා ප්‍රීතියෙන් උද්දාම වී කීවේය.

    “ඇත්ත” පෙරටත් වඩා අලෙවි විය. ලාල්ගේ ද සිරාගේ ද ප්‍රීතිය නිම් හිම් නැත. එජාප ආණ්ඩුවේ බලධරයන්ගේ මුහුණුවල තිබුණේ මළානික ස්වරූපයකි.

    ශ්‍රී ලංකාවේ කොමියුනිස්ට් පක්ෂයේ ප්‍රබුද්ධ නායකයකු වූ එච්. ජී. එස්. ආණ්ඩු හදන්න උදව් කළත්, ආණ්ඩු කරගහගෙන යාමේ පුරුද්දක් ඔහු තුළ තිබුණේ නැතැයි විද්වත් විචාරකයෝ පවසති. තමන් සම්බන්ධව පක්ෂය ගන්නා හරි හෝ වැරදි හෝ අදහසක් යෝජනාවක් තීරණයක් බවට පත්වූ විට ඉන් ඇතිවන ප්‍රතිඵල තමන්ට කෙතරම් අහිතකර වුවත් එය ද කරගහගෙන යාම ඔහුගේ සිරිතකි. මේ ක්‍රියාකලාපය අනුව එච්. ජී. එස්. වරෙක පහන් වැටක් බවට ද තවත් වරෙක තෙල් හිඳී ගිය ලාම්පු දැල්ලක් බවට ද පත් වෙයි.

    එච්. ජී. එස්. පුදුම හැකියාවක් ඇති සුවිශේෂි පුද්ගලයෙකි. එච්. ජී. එස්. ඉතාමත් අපූරු ව්‍යාපාරිකයෙකි. තවත් අතකින් දක්ෂ ඉංජිනේරුවෙකි. ඔහු ගෘහ නිර්මාණ ශිල්පියෙකි. අදත් ඔහුගේ පක්ෂයට අයත් එච්. ජී. එස්. නමැති ගෘහ නිර්මාණ ශිල්පියාට අයත් නිමවා ගොඩ නඟන ලද සුවිසල් මන්දිරයක් තිබේ.

    ප්‍රවීණ ලේඛක සම්භාව්‍ය පුවත්පත් කලාවේදී එච්. ජී. එස්. රත්නවීරයන් ලියූ බල්ලන්ට පත්තර කැවූ මාධ්‍යකරුවා හිසින් යුතුව ප්‍රවීණ ලේඛක පුවත්පත් කලාවේදී ගුණසේන විතානයන් විසින් පළ කළ පො‍තෙන් තොරතුරු විස්තර ලබාගත් වග සටහන් කරමු.

    ප්‍රවීණ පුවත්පත් කලාවේදියකු මෙන්ම චතුර කථිකයකු වූ එච්. ජී. එස්. රත්නවීර දකුණේ මාතර මිරිස්සේ ජන්ම ලාභය ලැබූ වමේ සෙන්පතියෙකි. පේරාදෙණිය විශ්වවිද්‍යාලයේ පෙරළිකාර ශිෂ්‍ය ජීවිතයක් ගත කළ ඔහු ඉංග්‍රීසි, රුසියන්, චීන සාහිත්‍යයෙහි‍ කෙළ පැමිණි සාහිත්‍යධරයෙකි. කොමියුනිස්ට් පක්ෂයේ ඉදිරිපෙළ නියමු‍වකු වූ ඔහු වරක් කොළඹ නගර සභාව ද නියෝජනය කළේය.

    අපි එච්. ජී. එස්. ගැන තව ටිකක් කතා කරමු.

    වරක් මහ ගත්කතුවර මාර්ටින් වික්‍රමසිංහයන්ගේ උපන්දිනයක ප්‍රවීණ ලේඛක කේ. ජයතිලකත් සමඟ ගුණසේන විතාන මහතා නාවල කිරිමණ්ඩල මාවතේ තිබුණු වික්‍රමසිංහයන්ගේ නිවසට ගොස් ඇත. මඳ වේලාවකට පසු එකල සෝවියට් තානාපති ‍රාෆික් නිෂානොව් යුවළ ද සුබ පැතුම් රැගෙන පැමිණ ඇත. රාජ්‍ය තාන්ත්‍රිකයකු වශයෙන් මෙන්ම උසස් කලාකාමියකු වශයෙන් ද ඔහු මෙරට ලේඛන කලාකරුවන් සමඟ ඉතාම ළඟින් ඇසුරු කර ඇත. සීමාසහිත මහජන ප්‍රකාශන ආයතනයේ එවකට අධිපතිවරයා වූ එච්. ජී. එස්. රත්නවීරට සෝවියට් සහ රුසියන් පොත් වැඩි වැඩියෙන් සිංහල හා දෙමළ බසින් ලබාගත හැකිවූයේ නිෂානොව් තානාපතිතුමන්ගේ උනන්දුව හේතුවෙනි.

    එම සංවාදයේදී නිෂානොව් මහතා ඇමැතූ මාර්ටින් වික්‍රමසිංහ මහතා සම්භාව්‍ය රුසියන් ලේඛකයන්ගේ පොත් වැඩි වැඩියෙන් සිංහල බසින් මුද්‍රණය කර එවන මෙන් ඉල්ලා සිටියේය. එම යෝජනාව පිළිගනිමින් තානාපතිවරයා දිග්ගැසෙන කතාවට මඳ විරාමයක් දුන්නේය.

    “මිස්ට වික්‍රමසිංහ, මට ඔය යෝජනාව මොස්කව්වලට කියල යවන්න පුළුවනි. ඊට වැඩිය හොඳයි එච්. ජී. එස්ට (H.G.S) කියනවා නම්,

    “ඇයි මොස්කව් ප්‍රකාශකයෝ ඔබතුමාට වැඩිය එච්. ජී. එස්ට සලකන්නේ” වික්‍රමසිංහ සිනාවෙමින් ඇසුවේය.

    “අපේ ප්‍රකාශන ලොක්කා එච්. ජී. එස්ට බයයි.”

    “සියල්ලෝම හඬනගා සිනාසුනහ.”

     

    (ප්‍රවීන ලේඛක ගුණසේන විතාන ලියූ බල්ලන්ට පත්තර කැවූ මාධ්‍යකරුවා එච්. ජී. එස්. රත්නවීර කෘති ඇසුරෙනි.)

     බන්ධුල ආර්. ගුලවත්න

    The article first published on dinamina.lk ⋆෴⋆

    - Advertisement -

    Latest Posts

    Don't Miss

    Stay in touch

    To be updated with all the latest news, offers and special announcements.